Skol an Emsav zo ur gevredigezh savet e 1969 hag abaoe 50 vloaz e kelenn brezhoneg hag e klask diorren implij ar yezh. Skol an Emsav zo termenet gant obererezhioù liesseurt : • Skol an Emsav zo ur greizenn stummañ war ar brezhoneg. Kentelioù sizhuniek evit an dud deuet a vez kinniget e Roazhon hag en trowardroioù met ivez stajoù berr e Breizh hag e lec’hioù all. Stummadurioù micherel 6 ha 9 miz a vez aozet e Roazhon, Sant-Ervlan ha Sant-Nazer evit an dud a fell dezho deskiñ ar yezh pe evit brezhonegerien o deus c’hoant da vont pelloc’h ganti. Skol an Emsav a dreuzkas ivez ar brezhoneg er bed a-bezh da skolidi eus Paris, eus Japan, eus Norvegia,… hag a heuilh kentelioù a-bell. • Skol an Emsav zo ul lec’h evit bevañ e brezhoneg. Evit kaout prantadoù dudius gant ar yezh hag ober ganti war ar pemdez. Kaset e vez neuze gant Skol an Emsav abadennoù e brezhoneg (klub lenn, dañs, kan, klub sinema, klub istor, endervezhioù ha nozvezhioù tro-dro da demoù liesseurt.) • Un ti embann eo Skol an Emsav ivez. An hentennoù Oulpan, al levr-skeudennoù « Ar 1000 ger kentañ e brezhoneg » evit ar re vras hag a re vihan hag al levr « Keloù Bro Dardoup » zo bet embannet ganti. Skol an Emsav zo he fal skignañ ar brezhoneg d’an holl. Skol an Emsav a lak an div gelaouenn e brezhoneg, « Bremañ » hag « #brezhoneg » da zont maez bep daou viz. Pennadoù hollvrezhonek zo e Bremañ diwar-benn Breizh hag ar bed. #brezhoneg zo ur gelaouenn divyezhek skrivet evit ar re a zo o teskiñ ar yezh pe evit ar re a faot dezhe gouzout hiroc’h diwar he fenn.
D'al Lun 8e30 - 5e30 D'ar Meurzh 8e30 - 5e30 D'ar Merc'her 8e30 - 5e30 D'ar Yaou 8e30 - 5e30 D'ar Gwener 9e00 - 12e00